PAWI NGE LAI ??

                                 PAWI  NGE  LAI ??

            Tun hma chuan 'Pawi' tih hming hi a awm lova,'Lai' tih a ni zawk a.Eng tik lai chiah khan nge 'pawi' tih a lo nih hriat theih a n lova.'Lai' tih aiin 'pawi' tih chu a lo lar ta tial tial a,tuna mi tam zawk hriat lar danah chuan 'Pawi' hi mizo hnam zinga hnam pakhat alo ni ta mai a.Pawi tih hming chawiin an district council pawh 'Pawi District Council' tih a lo ni ta nghe nghe a,amaherawh chu ,council huam chhunga cheng te chuan 'pawi' ni lovin 'lai' an nih zawk thu an sawi uar hle.'Pawi' tih chu Lusei hovin an kohna,an phuahchwp mai anih zia an sawi thin.Ziaktu thenkhat chuan 'Pawi' leh 'Lai' hi hnam hrang ve ve angin an sawi bawk a ni.

            A hmasain 'pawi' tih lo chhuah dan han sawi hmasa ila.Lusei hovin phuahchawpa an kohna chu hnam hming anga an lo put hlen tak a nih avangin engvangin nge 'Pawi' tia an lo phuah tih chi hetiang hian a chhan an lo sawi thin.

            1.Sawi dan pakhat ah chuan hmanlaiin insualna hmanrua atan 'Tek lung' hriam tak an hmang thin a.Tek lung chu an paipawng thin a.pangpawi tih awmzia chu puan ven emaw,hren kaih emaw leh taksa(tai) inkara thil dah hi a ni.chutiang thil pangpawi ching mi an nih avang chuan lusei hovin a tawng awmzia hre lovin 'Pang' tih leh 'Pawi' tih chu la hrangin anmahni koh nan an hmang ta a.cuvang chuan 'pang hnam' leh 'pawi hnam' chu phuah a lo ni ta a ni.

            2.Titi-ah chuan Chinzah,Zathang,Hlawnchhing leh Khenglawt te thlahtu Saikhama hian khuang a chawi a,a khuangchawinaah chuan a nupui chu a khuangchawina rawn chhim tu Kepchara lakah a ringhlel ta tlat mai  a,saruakin a hnawtchhuak ta an ti a.A nupui chuan kepchara te khaw lam chu a pan ta ngei a,kepchara chuan nupuiah alo nei ta a.Hnialuma te,Famchuna te,Mualchina te a hring a.An nu chu a thi ta a,a fate ho chu an nu ruang kil tur chuan an lokal a,ruang chungah chuan an tap ta hlawm a.An in unau dan te,nu khat hrin pa thuhmun lo an nih te an ngaihtuah a,pawi an ti hle a.'A va pawi tak em,nu khat hrin si pa thuhmun hrin kan lo nilo hi,a va pawi tak em ! Pawi fa kanlo nih hi' an ti a.Pawi fa an tih atang chuan 'Pawi' tih hi a lo chhuak ta a ni an ti.

            3.Sawi dan dang leh ah chuan hmanlai,in do chin laiin vawi khat chu Lai hovin Luseiho ram mu an phawk thut mai a.Lai pa pakhat chuan "khawnge keimah pawte"tiin chem vilikin a han zuang ta a.Luseiho chuan an lo kian a,an tlansan ta an ti.Heta 'Pawte' tih hi 'Keite' tihna a ni a.chutia a hming chhalna a "keimah Pawte" a tih chu Lusei ho chuan 'Pawite' an nih dawn chu an ti a.chuta tang chuan chhipa sam zial ho chu 'Pawite' tiin an ko zui ta zel a,hnam hming ang hiala ngaih a lo ni ta a ni an ti.An tawng te pawh pawi tawng   tih a lo ni ta zel a ni.Hetia pawi tih an lo nih tak ah chuan hnamdang lak atanga hriathran theihna bik ,chhinchhiahna remchang tak an lo nei leh nghal a,chu chu mipain chhipa sam an zial,'Hrum' an tih chu a ni.Tukhuma sam zial ho chu luseiho an ni a,sam phiarho chu hmar samphiar  tih an ni ang bawkin sam zialho chu 'pawi' tih an ni ta a ni.

            Lai an nih dan titi hrang hrang leh sawi dan hrang hrang a awm nual a.chungte chu han tarlang ila.

            1.Khawzing pathianin van atangin thir lungthu pakhat a rawn thlak a.van lai tak atanga a rawn thlak ni a an rin a vangin leh a tlakna hmun pawh chu hmun laili nia an rin avangin leh anmahni awmna velah pawh laili lai taka a tlak bawk a vangin anmahni chu 'Lai' an inti ta a ni,an ti.

            2.Ni chhuahna lamah Kawl an awm a,ni tlakna lamah vai an awm a,chumi inkara tlang rama chengte chu hnam khat 'Laimi' tih an ni,an ti bawk.

            3.Sawi dan dang lehah chuan thlang tlak laiin pawl (group) khat hmar lamah an kal a,tuna lusei tia kohte hi an ni.Pawl khat dang 'Zo' an tih,tuna mara tia koh tak te hi chhim lama kalte an ni a.Pawl dang a laia kal te chu tuna 'Lai' inti te hi an ni,a laia kal, a laia awm,Laimi tih an lo ni ta ani.An thlang tlaknaa khaw siam pakhat chu "Lai khua' an ti a,Lai-tlang pawh a awm bawk.

            4."Lai hnam,Lai mi kkan ni a,khawchhak lam phai rawna awm lai pawhin 'Lai' tih kan ni tawh a.A ram laili vang pawh niloin Laimi nihna kan nei sa a ni.Thlangtlak laia a laia kan kal vang pawh nilovin Laimi nihna kan nei sa a ni.vailen tirha Burma lam atanga sapho lo kal te pawhin an hna chanpual insemna ah pawh Laitlang kal turte an lo ruat thin tawh a ni.

            5.Burma ram Chin Hills  huam chhung zawng hi Lai ram a ni a,chuta tanga rawn tla thla te chuan Laifa nihna chhawmin 'Lai' an in ti ta zel a ni.

            6.Hmanlai hian puk lian tak pakhat a awm a,chu chu 'Lailun puk' tih a ni a,chu puk ah chuan unau pahnih Suihluan leh Hluansang an awm a.An unau chuan khaw pakhat 'Panlan' khua an siama,suihluan chu lal niin ,a nau Hluansang chuan kum tin vawk pakhat a pe thin tur a ni a,chu vawk talh dawn chuan a Suihluana chuan a chelh(man) anga,a nau Hluansanga chuan a vit tur a ni a.Chutia vawk vih tuma Hluansangan thal a han chelek chuan a u chu a vit ta thut mai a,a thi ta a,amah chu lalah a insiam ta a,Fapa pathum a nei a,Thangulh,Zathang leh  Bawmlung te an ni.Khaw dang an siam leh a 'Halkha' an vuah a.Halkha te,Thantlang te leh Sakta biala chengte chu Lailun puk atanga chhuak thahte an nih avangin a puk hming chawiin 'Lai'  an in ti ta a ni.

            7.B.S. Carey leh H.N.Tucker-te thu ziak 'The Chin Hills' Vol. 1 ,phek 152-naah a chunga han tarlan ang deuh bawk khian hetiang hian tarlan a ni.

            Lai inti hnam te zingah Halkha(Haka) leh Thlantlang(Klangklang) te hi Lai tia hriatlar ber an ni a.Anmahni pawhin hnamdang lai inti ve te chu Lai nilo ,bul hran nei ah an ngai a ni.

            An thu in hlanchhawng zel atanga hrit danin khaw lian tak pakhat 'yoklang' (Zotlang) an tih atang chuan unau pahnih Soe Hle (Suhluan) leh Hlwa sha (Hluansang) leh an fapate leh an tupa te chuan chhim lam an pan a,khaw thar an din a,chu chu 'Pailan' khua an ti.Halkha atanga hmar lam km 3 vela hlaah a ni.Suihluan chuan upa zawk anih avangin lal nih a hauh a.A nau Hluansanga chu kumtin vawk pakhat chawi turin a ti a,Hluansang chuan chu chu alo remti der a.Vawk a talh dawn apiangin Suihluan chuan vawk chu a man anga,Hluansang chuan a vit thin ang tiin an inrem ta a.Tichuan a vawk chawi tur man tuma Suihluan-a a kun lai tak chuan  vawk vihna tur mau zum chuan Hluansang chuan a u chu a vit ta vak mai aa thi ta a.Hluansang chu lalah a insiam ta a. A u a thahna hmuna awm reng chu an khua tan vanduani a thlen palh hlauvin  khawthar an kai ta a.Halkha khua an lo din ta a ni.chutih lai vek chuan yoklang lam atanga lal pahnihte chuan Thantlang khua an lo din ve a ni ".

            Sawi dan hrang hrang atanga han khaikhawm dawn chuan a lailia awm vang ngawta 'Lai' tia invuah leh ,thlangtlak laia a laia kal an nih avanga 'Lai' tia invuah ngawt chu hnam pianna bul anga han pawm ngawt chu a harsa deuh maithei a,mahse 'Lai' an nih dan tak erawh chhui chhuah a har hle si.Engpawh nise 'Lai' hnam chu an awm ngei a,Lailun puk atanga chhuak an nih avanga 'Lai' tia invuah ta pawh an ni mahna.Vai len tirha Burma lam atanga Sapho lo kalte pawhin  'Lai' an lo nih dan chu an lo ziak tawh ngei a.Lai khua,Laitlang,Lairam tih te pawh a lar hle bawk a ni.Burma rama Chin Hills huam chhung zawng hi Lairam a ni a,chuta tanga thlang rawn tla thenkhat te chuan Laifa nihna an chhawm zel niin a lang.

            Tuna Lai District Council huam chhunga cheng ten 'Lai' nia an in sawina hi a dik ngei ang .Amaherawh chu 'Pawi' tih hi lar zawk anih avangin leh sawrkar pawhin a hriatdan anih avangin tamtak chuan 'Pawi' an la inti tho a ni.....pawi nih hi duh vang emaw duhloh vang emaw lam nilovin ,lusei hovin min hriatdan/kohdan mai chauh a ni...Lai a ni e.